Երկու տարում ՀՀ բարձրագույն դատական խորհրդի դատական դեպարտամենտում 2600 հաստիքից ազատվել է 1100 աշխատակից։ Այս մասին ՀՀ Ազգային ժողովի պետական–իրավական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստի ժամանակ ասաց ՀՀ ԲԴԽ դատական դեպարտամենտի ղեկավար Նաիրի Գալստյանը։
«Պատկերացրեք հոսունության աստիճանը. աշխատակիցը գալիս է, մինչև հարմարվում է, մտնում է հունի մեջ, տեղափոխվում է այլ գերատեսչություն։ Պատճառը ցածր աշխատավարձերն են»,– ասաց նա։
Գալստյանի խոսքով` իրենց աշխատակիցները անմարդկային ծանրաբեռնված են, ու անմարդկային էլ ցածր են նրանց աշխատավարձերը։
«Շուրջ 600–700 կարգադրիչ, որ ապահովում է հարյուրավոր դատական նիստերի բնականոն գործընթացը, 110–120 հազար դրամ է ստանում»,– նշեց նա։
Նույնը, ըստ նրա` վերաբերում է դատավորի աշխատակազմին։ Դատավորն ունի օգնական և գործավար, որոնք ստանում են 120–130 հազար դրամ աշխատավարձ։
«Նրանք էլ միշտ շատ ծանրաբեռնված են լինում ու նույնպես որոշում են գնալ այլ գերատեսչություն։ Դատավորի համար դա շատ դժվար է, որ իր աշխատակիցը պարբերաբար փոխվում է»,– ընդգծեց Գալստյանը։
Դատական դեպարտամենտի ղեկավարն ավելացրեց, որ 2025 թվականի համար 750 մլն դրամով կրճատվել է իրենց աշխատավարձերի ֆոնդը, որը չի ընդունվել բարձրագույն դատական խորհրդի կողմից։ Կայացվել է արձանագրային որոշում ու ներկայացվել ՀՀ ֆինանսներ նախարարություն։
