Վերջին շրջանում բազմաթիվ լուրեր ենք ստանում Արցախից, բայց լուրերը ստուգելու հնարավորություն չունեինք։ Վերջերս կարողացանք կապ հաստատել Ստեփանակերտում մնացած հայերից մեկի հետ և իմանալ մեզ հետաքրքրող հարցերի պատասխանները։ Փոխանցում է step1.am-ը։
Ստեփանակերտը լրիվ հոսանքազրկված է, քաղաքում մնացած բոլոր բնակիչներին տեղափոխել և բնակեցրել են Կամոյի փողոցում (Կամրջի մոտ) գտնվող «Ցեխավիկ Էդոյի» տանը։
Ադրբեջանցիներ Ստեփանակերտում չկան, մենակ ռուս խաղաղապահներ են, իսկ բոլոր շենքերի և տների մուտքերը փակ են եւ կնքված։
Փողոցները լի են սովից սատկած կենդանիների դիակներով։ Նաև այնտեղ խոսում են, որ մինչև մարտ բոլորս կվերադառնանք։
Հետաքրքիր է, որ այսօր Կարմիր մահիկի Բաքվի գրասենյակի աշխատակիցներն այցելել են Արցախում, այդ թվում՝ Ստեփանակերտում մնացած հայերին՝ «գնահատելու նրանց կարիքները»։
Պաշտոնական հաղորդագրության համաձայն՝ այցը տեղի է ունեցել շաբաթասկզբին, կազմակերպության աշխատակիցները «ծանոթացել են քաղաքացիների կենսապայմաններին և հարցում անցկացրել՝ պարզելու բնակիչների կարիքները, թե ինչ օգնություն և ծառայություններ կարող են տրամադրել»:
Ամենայն հավանականությամբ, դա պայմանավորված է փետրվարի 7-ին Ալիևի առաջիկա «ընտրություններով»։
