ՀՀ ընդհանուր իրավասության դատարանների քրեական մասնագիտացման դատավորների թիվը կավելացվի։ Համապատասխան որոշումն ընդունվեց ՀՀ կառավարության այսօրվա նիստի ժամանակ, որը վարում է ՀՀ փոխվարչապետ Մհեր Գրիգորյանը։
ՀՀ արդարադատության նախարարի տեղակալ Արմենուհի Հարությունյանի խոսքով` ՀՀ առաջին ատյանի ընդհանուր իրավասության դատարանների քրեական մասնագիտացման դատավորների թվաքանակի կազմի ավելացումը պայմանավորված է մասնավոր մեղադրանքով վարույթների քանակի ավելացմամբ։
«ՀՀ քրեական օրենսգրքի 2022 թվականից ուժի մեջ մտած մասնավոր մեղադրանքի հոդվածներով վարույթների իրականացման իրավասություն ունեն հատուկ մասնագիտացված դատավորները։ Նրանց թիվն այսօր շատ քիչ է, իսկ տվյալ հոդվածներով գործերի քանակը գնալով ավելանում է։ Այդ պատճառով անհրաժեշտություն է առաջացել ավելացնելու դատավորների քանակը»,– նշեց նախարարի տեղակալը։
Հարությունյանը ներկայացրեց նաև վիճակագրական մի շարք տվյալներ, ըստ որոնց` 2021–23 թթ. մասնավոր մեղադրանքի հոդվածներով 1108 գործ է քննվել, որոնցից 475–ը Երևանի առաջին ատյանի քրեական դատարանի կողմից, 633–ը` մարզերի առաջին ատյանի ընդհանուր իրավասության դատարանների։
Բացի այդ, 2022 թվականի հուլիսի 1–ից 2024 թ. ապրիլի 1–ն ընկած ժամանակահատվածում այս հոդվածներով ՀՀ քննչական կոմիտեում նախաձեռնվել է 1296 վարույթ։
