• November 30, 2019

Հանցագործները պաչել են հեղափոխության խաչն ու շարունակում են պաշտոնավարել․ իրավապահ ողջ համակարգում պետք է «ուբորկա» սկսել

Հանցագործները պաչել են հեղափոխության խաչն ու շարունակում են պաշտոնավարել․ իրավապահ ողջ համակարգում պետք է «ուբորկա» սկսել

«Ոստիկանները հակագազով ու մահակով ցուցմունք են կորզում» վերտառությամբ համացանցում տարածված  աղմկահարույց  տեսանյութի առնչությամբ Հատուկ քննչական ծառայությունը նյութեր է նախապատրաստում, իսկ ՀՀ ոստիկանապետի ժամանակավոր պաշտոնակատար Արման Սարգսյանի հանձնարարությամբ ներքին անվտանգության վարչությունում ստուգումներ են իրականացվում։

«Զուգահեռաբար տարվում են աշխատանքներ` տեսանյութում երևացող անձանց ինքնությունը պարզելու ուղղությամբ: Ծառայողական քննության շրջանակներում ոստիկանության պետի ժամանակավոր պաշտոնակատարի հրամանով ոստիկանության Ճամբարակի բաժնի պետ Նարեկ Սիմոնյանի լիազորությունները ժամանակավորապես դադարեցվել են»,- նշված է ոստիկանության տարածած հաղորդագրության մեջ:

Թե կոնկրետ երբ  է  նկարահանվել այդ տեսանյութը և ով է խոշտանգման ենթարկվող անձը՝ դեռևս հայտնի չէ։

Իրավապաշտպան Մարինա Պողոսյանը թեև նայել է  տեսանյութը, սակայն այդ կադրերից  չի զարմացել՝ շեշտելով, որ իր գործունեության ընթացքում խոշտանգման  միջոցով  ցուցմունքներ կորզելու առավել վատ դեպքերի մասին գիտի։

«Ամենասարսափելին այն է, որ այդ արատավոր երևույթը շարունակվում է առ այսօր, որովհետև տարիներ շարունակ որևէ մեկն իր կատարած այդօրինակ հանցագործության համար քրեական պատասխանատվության չի ենթարկվել»,- «Առաջին լրատվական»-ի հետ զրույցում շեշտեց Մարինա Պողոսյանը։

Վերջինիս  խոսքերով՝ իրավապահ բոլոր կառույցներում ծառայողական քննություններ պետք է իրականացվեն՝ սկսած ՀՀ գլխավոր  դատախազությունից  և  ոչ միայն այս տեսանյութի, այլև  խոշտանգման և բռնության բազմաթիվ այլ դրվագներով առկա գործերի համար պատասխանատվության պետք է ենթարկվեն ուժային կառույցների ներկա ու նախկին ղեկավարներն ու մի շարք անձինք։

«Իրավապահ ողջ համակարգում «генеральная уборка» է  պետք անել, որովհետև Հայաստանում  քաղաքացու իրավունքներն ու արժանապատվությունը մշտապես ոտնահարվել է, քաղաքացին անկախ՝  ամբաստանյալ, դատապարտյալ, վկա, թե տուժող  կարգավիճակից ոստիկանական  բաժանմունքներում ու ԱԱԾ-ի պադվալներում նվաստացվել է ու շատ դեպքերում բռնության միջոցով ցուցմունք է գրել իր իսկ դեմ ու մի քանի տարի պատիժ շալակելով՝ ուղևորվել ՔԿՀ կամ ինքնասպանություն գործել, որովհետև այս երկրում այդ գործելաոճի դաբռոն  ամենավերևից է տրված եղել»,- նշեց մեր զրուցակիցը։

Մանրամասները՝ տեսանյութում։

 

© 1in.am