Պետությունը լեգալացնում է գողությունը․ Սաշիկ Սարգսյանն ու մյուսները իրավունք չունեն ազատության մեջ լինել

«Առաջին լրատվական»-ը «Վելես» իրավապաշտպան հասարակական կազմակերպության ղեկավար Մարինա Պողոսյանին խնդրեց անդրադառնալ թրենդային մի երևույթի, երբ Նիկոլ Փաշինյանը հայտարարեց, որ Ալեքսանդր Սարգսյանը պատրաստ է 30 միլիոն վերադարձնել պետությանը, այնուհետև Վաչագան Ղազարյանը պատրաստակամություն հայտնեց 6 միլիոն վերադարձնել, իսկ նախկին պաշտոնյաներից մեկն էլ հայտարարեց, որ պատրաստ է պետությանը տալ Ծաղկաձորի իր հյուրանոցը:

«Ինձ համար սա մարդկային տրամաբանությունից դուրս է, իսկ օրենքի առումով՝ ընդհանրապես աղերս չունի արդարադատության հետ»,- նշեց Մարինա Պողոսյանը՝ այս ամենը նմանեցնելով հարսանիքների ժամանակ հայտարարվող նվերներին:

Նա տարակուսում է՝ «ի՞նչ է նշանակում պատրաստակամություն հայտնել. հանցավոր ռեժիմի որոշ անդամներ պատրաստակամություն են հայտնում իրենց գողացածի, իրենց յուրացրածի, իրենց լափածի մի մասը բերել հետ տալ, ու դրա մասին հայտարարվում է: Մնում է այդ մարդկանց սրբերի շարքին դասենք»:

Մարինա Պողոսյանի խոսքով՝ այս բոլոր պաշտոնատար անձանց աշխատավարձերը չեն անցել 700 հազար դրամից, բայց նրանց կուտակածը նվազագույնը 700 հազար դոլարից է սկսվում:

Մեր զրուցակիցն այս երևույթը աբսուրդ է համարում. «Իսկ որևէ մեկը ժողովրդին հարցրե՞լ է, չէ՞ որ տուժողը ժողովուրդն է. այդ 30 միլիոնի մեջ 14 ցենտն էլ կարող է իմն է, իսկ ինձ հարցրե՞լ եք»:

Հարցազրույցն ամբողջությամբ՝ տեսանյութում: