Իրավապաշտպան Մարինա Պողոսյանը և մի քանի արցախցիներ այսօր բողոքի ակցիա իրականացրին Քննչական կոմիտեի շենքի դիմաց և աղմկահարույց հայտարարություն արեցին։ Մարինա Պողոսյանի խոսքով՝ իրենց ձեռքի տակ փաստաթղթեր են հայտնվել, որոնք փաստում են, որ Արցախի ներդրումային հիմնադրամից 467 միլիոն դոլար է յուրացվել։ Իրենք բացահայտել են այդ գումարից 27 միլիոն դոլարի յուրացումը։
«Արցախի և Հայաստանի մի շարք պաշտոնատար անձինք իրար հետ համաձայնության գալով յուրացրել են Արցախի ներդրումային հիմնադրամի գումարները, որը տրամադրված է եղել Արցախում փոքր ու միջին բիզնեսը զարգացնելու համար։ Խոսքը վերաբերում է Արցախի նախկին փոխոստիկանապետ Կոմիտաս Կարապետյանի և նրա ընտանիքին, Զանգեզուրի պղնձամոլիբդենային կոմբինատի նախկին տնօրեն, Սյունիքի նախկին մարզպետ Վահե Հակոբյանին, Զանգեզուրի պղնձամոլիբդենային կոմբինատի նախկին տնօրեն Մհեր Պոլոսկովին և Նարեկ Ամբարյանին, որը հանդիսանում է Գլխավոր դատախազության կոռուպցիայի դեմ վարչության պետի եղբայրը, Զանգեզուրի պղնձամոլիբդենային կոմբինատի գլխավոր տնօրենի առաջին տեղակալը․․․ Միայն այս 4 ընտանիքները 27 միլիոն դոլարի չափ յուրացում են կատարել Արցախի ներդրումային հիմնադրամից»,- ասաց իրավապաշտպանը։
Նրա խոսքով՝ ամբողջ տեղեկությունը փաստերով 2023 թվականի հոկտեմբերին ներկայացրել են Ազգային անվտանգության ծառայություն, նոյեմբերին այն փոխանցվել է Քննչական կոմիտե։
«Նոյեմբերի 3-ին քրեական վարույթ է նախաձեռնվել, նոյեմբերի 13-ին ինձ կանչում են հարցաքննության և նույն օրը իմ դեմ մահափորձ է կատարվում, այսինքն՝ վստահ են եղել, որ ես չեմ հասնի, մեքենայի անիվների բոլտերն էին թուլացրել։ Այնքան պրիմիտիվ են, որ նույն բանը 2-3 շաբաթ հետո անում են հաղորդում ներկայացրած մեկ այլ անձի ավտոմեքենայի հետ»,- հավելեց Մարինա Պողոսյանը։
Oragir.News-ը Զանգեզուրի պղնձամոլիբդենային կոմբինատի նախկին տնօրեն Վահե Հակոբյանից հետաքրքրվեց, թե ինչպես է վերաբերվում իրեն ուղղված մեղադրանքին, վերջինս հարցը լսելիս նախ զարմացավ, ապա պատասխանեց․ «Առաջին անգամ եմ լսում նման բան»։
Քննչական կոմիտեի մամուլի խոսնակ Գոռ Աբրահամյանն էլ մեր հարցմանն այսպես արձագանքեց․ «Նախաքննության շահերից ելնելով՝ տեղեկատվություն չի տրամադրվում»։
Մարամասները՝ տեսանյութում։
© ORAGIR.NEWS https://oragir.news/hy/material/2024/01/18/103900?fbclid=IwAR3TXtSGN1jNCqfZJ_c6fDc3WwQSs5w5Ku3U-X0BkUC7kSelaQi77BX1KA4
