Այսօր՝ հունիսի 16-ին, Աշտարակի խճուղում ոստիկանության աշխատողի և լրագրողի միջև միջադեպ է տեղի ունեցել՝ ոստիկանը հարվածել է լրագրողին։ Միադեպից հետո ՆԳՆ խոսնակ Նարեկ Սարգսյանը իր էջում գրառում է կատարել, տեղեկացնեկով, որ ոստիկանն ազատվել է աշխատանքից։ Արդյո՞ք այս իրավիճակում միայն աշխատանքից ազատելը բավարար է, որևէ այլ պատասխանատվության չպե՞տք է ենթարկվի նա։
Oragir.News-ն այս թեմայի վերաբերյալ զրուցեց իրավապաշտպան Մարինա Պողոսյանի հետ։
Նա հիշեցրեց, որ երկու տարի առաջ՝ սեպտեմբերի 14-ին, Դեմիրճյան փողոցում Հայկազ Ջոմարդյանը և նրա համախոհները բռնության են ենթարկել իրեն, բռնի ուժով նստեցրել են մեքենա՝ բերանքսիվայր, իսկ Արաբկիր բուժկենտրոնում թույլ չեն տվել օգտվել փաստաբանի ծառայությունից։
«Չնայած այս ամենին, մինչ օրս ես հանրային լայն քննարկումից զերծ եմ մնացել։ Բայց պետք է ընդգծել՝ անպատիժ մնացած չարագործությունը ժամանակի ընթացքում միայն խորանում է և հետագայում հարվածում բոլորիս։ Եթե այն ժամանակ լրագրողական համայնքը, որն այս ամենի ականատեսն էր, միայն դատապարտելու փոխարեն համախմբվեր և պահանջեր պատասխանատվություն, այսօր իրավիճակն այլ կլիներ։ Սակայն գերակշռեց լռությունը։ Արդյունքում նույն անձինք բռնության ենթարկեցին նաև որդեկորույս մայրերին ու 44-օրյա պատերազմի զոհվածների ծնողներին»,- ասաց նա։
Նրա խոսքով՝ երբ որդեկորույս մայրերին քարշ էին տալիս Եռաբլուրում, ոչ ոք չընդվզեց։ Իրավապաշտպանը կարծիք հայտնեց, թե որտեղ դրամաշնորհային ծրագիր չկա, ընդվզող էլ չկա։
«Այս ամենն իրականում՝ մանկական կոմպլեքսներ ունեցող տղամարդկանց վարք է։ Իրական տղամարդը երբեք կնոջ վրա ձեռք չի բարձրացնում։ Թող գնային թուրքերի դեմ պայքարեին, ոչ թե իրենց երկրում խաղաղ քաղաքացիներին ծեծեին»,- հավելեց Մարինա Պողոսյանը։
Ավելի վաղ հայտնել էինք, որ այսօր՝ հունիսի 16-ին, Քասախում ոստիկանների և ցուցարարների միջև հրմշտոց է սկսվել։ Կարմիրբերետավորներից մեկը հունից դուրս է եկել, ոստիկանին անվայել պահվածքով գոռգոռացել քաղաքացիների վրա, այնուհետև հարվածել 24news-ի լրագրողին, որը նրան հանդարտվելու կոչ էր անում։
© ORAGIR.NEWS https://oragir.news/hy/material/2025/06/16/159867?fbclid=IwY2xjawK-OwxleHRuA2FlbQIxMQBicmlkETE0TU5QMWhqcW9xUkFJcDAzAR7YqNXibP9R8PSeHHipeX-nnZui1PZLTBbQpAGj6jLo53WuO4vALtLtn-e_HA_aem_7ref-eFzmo3qLgIHqUux-Q
