ՀՀ ԱԺ ՀՀԿ խմբակցության նախկին պատգամավոր Միհրան Պողոսյանը, որը մեղադրվում է առանձնապես խոշոր չափերով գույք յուրացնելու, պաշտոնեական լիազորությունները չարաշահելու մեջ եւ այս պահին գտնվում է Ռուսաստանի Դաշնությունում, երեկ բարձրաստիճան պաշտոնատար անձանց էթիկայի հանձնաժողով է ներկայացրել իր 2018-ի տարեկան հայտարարագիրն ու 2019-ին՝ պաշտոնը դադարեցնելուց հետո իր հայտարարագիրը:
2018-ի տարեկան հայտարարագրից պարզ է դառնում, որ Պողոսյանը նույն տարում ձեռք է բերել հողամաս 20 մլն 729 հազար 870 դրամով եւ օտարել է 1 արտադրական նշանակության շինություն 5 մլն դրամով ու 1 հասարակական նշանակության շինություն 581 մլն 400 հազար դրամով:
2018-ին Պողոսյանը 13 մլն դրամով ձեռք է բերել «RANGE ROVER Supercharged 5.0 VOGUE» մակնիշի ավտոմեքենա:
2018-ի տարեսկզբում Պողոսյանի դրամական միջոցները կազմել է 30 մլն դրամ եւ 155 հազար դոլար, իսկ տարեվերջում 598 մլն դրամ եւ 152 հազար դոլար:
Նույն տարում Պողոսյանն ընդհանուր առմամբ ունեցել է 647 մլն 574 հազար 675 դրամի չափով եկամուտ, որը գոյացել է վերոնշյալ գույքերի օտարումից, աշխատավարձից եւ վարձակալության դիմաց ստացված վճարներից:
Պաշտոնը դադարեցնելու օրվա դրությամբ (14.01.2019) Պողոսյանն ունեցել է 13 անշարժ գույք՝ 9 հասարակական նշանակության շինություն, 2 առանձնատուն, 1 հողամաս եւ 1 ավտոտնակ: Այստեղ մեկ այլ ուշագրավ հանգամանք կա. 2017 թվականին, երբ Պողոսյանը ստանձնում էր ԱԺ պատգամավորի պաշտոնը, հայտարարագրել է 9 անշարժ գույք: 2017-ի տարեկան հայտարարագրում նա ոչ անշարժ գույք է ձեռք բերել եւ ոչ էլ օտարել է: Իսկ 2018-ի տարեկան հայտարարագրից պարզ է դառնում որ նա 1 անշարժ գույք է ձեռք բերել, 2 անշարժ գույք էլ օտարել է: Այսինքն, նա պետք է ունենար ընդհանուր առմամբ 8 անշարժ գույք, սակայն, ինչպես երեւում է հայտարարագրից, նա թաքցրել է 5 անշարժ գույք:
Պաշտոնը դադարեցնելու օրվա դրությամբ Պողոսյանն ունեցել է 1 ավտոմեքենա՝ «RANGE ROVER Supercharged 5.0 VOGUE» մակնիշի:
Պաշտոնը դադարեցնելու օրվա դրությամբ Պողոսյանն ունեցել է 598 մլն դրամ եւ 152 հազար դոլար: 2019-ի տարեսկզբից մինչեւ պաշտոնը դադարեցնելու օրը նա ունեցել է 114 հազար 660 դրամի չափով եկամուտ, որը գոյացել է աշխատավարձից:
© Armtimes.com
