Կդադարեցվի արտակարգ իրավիճակների նախարարության գործունեությունը, և կստեղծվի ներքին գործերի նախարարություն։ Կառավարության կառուցվածքում փոփոխություն կատարելու նախագիծը հավանության արժանացավ գործադիրի՝ նոյեմբերի 24-ի նիստում։
Ներքին գործերի նախարարությունն իր մեջ ներառելու է երեք խոշոր ծառայություն՝ ոստիկանությունը, փրկարար ծառայությունը և միգրացիայի ու քաղաքացիության ծառայությունը։ Նախարարությունում կկենտրոնացվի հինգ հիմնական ոլորտ՝ հասարակական կարգի պահպանություն, հանցագործությունների կանխում և բացահայտում, աղետների ռիսկի կառավարում, միգրացիա և քաղաքացիություն, պետական ռեզերվների կառավարում և հումանիտար հարցեր։
Նախագիծը ներկայացնող արդարադատության նախարարի պաշտոնակատար Գրիգոր Մինասյանի խոսքով՝ նոր նախարարության ստեղծումը թույլ կտա ապահովել ոստիկանության ոլորտի թե խորհրդարանական, թե քաղաքացիական վերահսկողություն։
«Փաթեթային լուծմամբ առաջարկվում է զուգահեռաբար դադարեցնել արտակարգ իրավիճակների նախարարության գործունեությունը, և որպես անցումային փուլ նախատեսվել է մինչև չորս ամիս ժամկետ՝ գործունեության դադարեցման համար։ Այսինքն, նախագծերի ընդունումից հետո որոշակի կարճ ժամանակահատված ունենալու ենք կառավարության 13 անդամ, որից հետո, երբ ամբողջությամբ դադարեցվի ԱԻՆ գործունեությունը, կվերադառնանք 12 անդամով գործունեության ծավալմանը»,- ասաց Մինասյանը։
Վարչապետ Նիկոլ Փաշինյանը նկատեց, որ խոսքը միայն նախարարությունների թվի փոփոխության և օպտիմալացման մասին չէ․ «Այս փոփոխության ամենախորքային և ամենահեռանկարային իմաստը նոր ստանդարտի ոստիկանություն և փրկարար ծառայություն ունենալն է։ Խոսքը ծառայության նոր որակի մասին է»,- նշեց նա։
Փաշինյանը հայտնեց, որ ոստիկանության պետը և փրկարար ծառայության ղեկավարը կլինեն նախարարի տեղակալներ։ Ոստիկանապետը կլինի նաև Անվտանգության խորհրդի անդամ։ Ներքին գործերի նախարարը կունենա ևս երկու տեղակալ, որոնք կիրականացնեն բացառապես քաղաքացիական գործառույթներ։
Տեղակալները ներքին գործերի նախարարի առաջարկությամբ նշանակվելու և ազատվելու են վարչապետի կողմից, իսկ ծառայությունների ղեկավարներին միանգամից նշանակելու է վարչապետը։
«Ոստիկանության զորքերը կձևակերպենք որպես ոստիկանության գվարդիա և այն ավելի ընդլայնված գործառույթներ կունենա անվտանգության ապահովման առումով, քան այսօր ունեն ոստիկանության զորքերը»,- ասաց վարչապետը։
Փաշինյանը տեղեկացրեց նաև, որ նախարարության ձևավորման մեկնարկից պետք է սկսվի կամավոր ատեստավորման գործընթացը՝ ոստիկանության և փրկարար ծառայողների աշխատավարձերը առնվազն կրկնապատկելու նպատակով։
