«Առեքս գազ» և «Էյջ Բի Քընսթրաքշն» ՍՊԸ-ների սեփականատեր Արմեն Հովհաննիսյանը «Հակակոռուպցիոն բլոգ»-ին տված բացառիկ հարցազրույցում ասել է, որ Արամ Վարդանյանը, ով հանրությանը հայտնի է որպես Վստրեչի ապեր, տարիներ առաջ հորն արտերկրում բուժելու նպատակով իրենց ընդհանուր մտերիմի միջոցով 22 միլիոն դրամ գումար է վերցրել պարտքով և մինչ օրս չի վերադարձրել։
Արմեն Հովհաննիսյանը նաև պատմել է, թե ինչպես է Երևանի նախկին քաղաքապետ Տարոն Մարգարյանը «քցել» իրեն 800 միլիոն դրամ։ Գործարարի ներկայացմամբ՝ ինքն ընդհանուր առմամբ 1 միլիարդ դրամից ավելի է տուժել։
Նրա կինը ամուսնու անունից հաղորդում է ներկայացրել հանցագործության մասին։ Հովհաննիսյանը Հայաստանում չէ, նրա նկատմամբ հետախոզում է հայտարարված, քանի որ մեկ այլ քրեական գործով իրեն մեղադրանք է առաջադրվել։ Վերջինիս խոսքով՝ այդ գործը պարզապես ծիծաղելի է։
Արմեն Հովհաննիսյանի խոսքն ամբողջությամբ՝ տեսանյութում։
Ի դեպ, «Հակակոռուպցիոն բլոգը» փորձեց կապ հաստատել Արամ Վարդանյանի հետ, որպեսզի նրա կարծիքը ևս լսի։ Վերջինիս բջջային հեռախոսահամարին կատարած մեր զանգին պատասխանեց նրա եղբորորդին՝ Արման Վարդանյանը։ Նա խորհուրդ տվեց Վստրեչի ապերի փոխարեն խոսել նրա փաստաբանի՝ Լուսինե Սահակյանի հետ, ով ավելի լավ է տիրապետում գործի մանրամասներին։
Վերջինս խնդրեց գրավոր ուղարկել հարցերը։ Հարցերը ստանալուց և մի քանի ժամ սպասեցնելուց հետո տիկին Սահակյանը որոշեց ոչ թե մեր հարցերին պատասխանել, այլ իր կարծիքն արտահայտել մեր կայքի վերաբերյալ՝ մեզ մեղադրելով միակողմանի լուսաբանման մեջ, այն պարագայում, երբ ավելի քան վեց ժամ սպասել էինք իր պատասխաններին՝ նախքան նյութի հրապարակումը։
