Կաշառք, փողերի լվացում, հովանավորչություն. «Քոչարյանի և նրա խունտայի դեմ նոր քրեական գործ պետք է հարուցվի»

Երեկ Ազգային ժողովում, խորհրդարանի խոսնակ Արարատ Միրզոյանի նախաձեռնությամբ, տեղի ունեցան փաստահավաք խորհրդարանական լսումներ՝ «Պետության կողմից «Հյուսիսային պողոտա-Կասկադ» ծրագրով բացառիկ գերակա հանրային շահ ճանաչելու հետևանքով սեփականության իրավունքի ոտնահարման խնդիրները» թեմայով:

Հիշեցնենք, որ 2000 թ. նոյեմբերի 25-ին ՀՀ կառավարության որոշմամբ և դրան հաջորդած սեփականության օտարման և կառուցապատման որոշումներով՝ Հայաստանում սկիզբ դրվեց քաղաքացիների զանգվածային ունեզրկման գործընթացին։ Հյուսիսային պողոտայի և Կասկադի տարածքում բնակարաններ ունեցող սեփականատերերը վտարվեցին իրենց բնակարաններից՝ չնչին փոխհատուցումներով։ Նրանցից շատերն առ այսօր որևէ փոխհատուցում չստանալով՝ ամեն հինգշաբթի հավաքվում են կառավարության շենքի դիմաց և պահանջում են իրենց գումարները, բնակարանները։

Խորհրդարանական լսումների նախաձեռնությունը պատկանում է ԱԺ «Իմ քայլը» խմբակցության պատգամավոր Գայանե Աբրահամյանին, որը, նախօրեին տեղեկացնելով լսումների մասին, գրել էր. «Հանցագործություններից ամենասարսափելին այն հանցագործություններն են, որոնք իրականացվում են պետության ձեռքով, «պետական շահի» հիմնավորմամբ՝ թիրախավորելով քաղաքացուն և քաղաքացու սահմանադրական իրավունքները, երբ քաղաքացուն պաշտպանելու կոչված ինստիտուտները լծվում են քաղաքացու իրավունքները համակարգայնորեն, նպատակաուղղված տրորելու գործին։ Ցավոք, անկախ Հայաստանի պատմության ընթացքում նախկին իշխանությունների կողմից քաղաքացիների իրավունքների ոտնահարման այսպիսի դեպքերը բազմաթիվ են։ Այդ դեպքերից յուրաքանչյուրը մեր պետության խարանն է, անարգանք մեր Սահմանադրության, մեր պետականության, քաղաքացու արժանապատվության ու մեզնից յուրաքանչյուրի նկատմամբ»։

Գայանե Աբրահամյանը նաև տեղեկացրել էր, որ պետության կարիքների համար գույքի հարկադիր օտարման միջոցով սեփականազրկված քաղաքացիների իրավունքների վերականգնումը «Իմ քայլը» դաշինքի նախընտրական ծրագրի դրույթներից է եղել, և այժմ իրենք քայլ առ քայլ սկսում են դրա իրականացումը։ Իսկ առաջին քայլը խորհրդարանական լսումների նախաձեռնումն էր, որի նպատակն էր վերհանել հանրության կարիքների համար գույքի հարկադիր օտարման միջոցով սեփականազրկված քաղաքացիների հիմնարար իրավունքների ոտնահարման դեպքերը, իրավախախտումները, քննարկումներ սկսել օրենսդրական փոփոխությունների անհրաժեշտության և այդ տարիներին քաղաքացիների սեփականության խախտված իրավունքների վերականգնման հնարավոր իրավական ուղիների մշակման շուրջ։

ԱԺ լսումների ժամանակ «Պետական կարիքների զոհեր» ՀԿ նախագահ Սեդրակ Բաղդասարյանը ընդգծեց Ռոբերտ Քոչարյանի առանձնակի դերակատարությունը այս հանցագործության մեջ։ Ըստ նրա, սակայն, Քոչարյանը մենակ չէր կարող այդ ամենը անել և նրան պետք էին համախոհներ։ «Եվ ստեղծվեց մի խունտա, որը ղեկավարում էր այն ժամանակ Արդարադատության նախարար Դավիթ Հարությունյանը, Երվանդ Զախարյանը: Այս բոլոր գործընթացների մեջ իր դերակատարությունն է ունեցել ՀՀ դատական համակարգը, ինչպես նաև հարկադիր կատարողների ինստիտուտը»,- հայտարարեց Բաղդասարյանը՝ նոր իշխանություններից պահանջելով քրգործ հարուցել մի անձնավորության դեմ, որին այսօր էլի դատում են շատ ավելի լուրջ մի հանցանքի համար: Ըստ էության՝ ակնարկելով հենց Ռոբերտ Քոչարյանին։ Բացի դրանից՝ Բաղդասարյանը պահանջեց քրգործ հարուցել նաև Դավիթ Հարությունյանի և Երվանդ Զախարյանի դեմ: Նա վստահեցրեց, որ փաստերով կարող է ապացուցել նրանց արած հանցագործությունները, որի հետևանքով Հայաստանի բյուջեին հասցվել է մոտ 3 միլիոն դոլարի վնաս:

Նույն կաշառքի, փողերի լվացման, չարաշահումների մեխանիզմները գործել են նաև Կասկադի հողատարածքների դեպքում։ Դրանց մասին բարձրաձայնած ու հենց այդ պատճառով հետապնդումների ենթարկված իրավապաշտպան Մարինա Պողոսյանն «Առաջին լրատվական»-ի հետ զրույցում ասաց, որ իրենք ժամանակին սեփական հետաքննությամբ փողերի լվացման հսկայական մեխանիզմ էին բացահայտել, որում ներգրավված էին բազմաթիվ պաշտոնյաներ, սակայն այն իրավապահների կողմից քննության առարկա չդարձավ, փոխարենը քրեական հետապնդումներ սկսվեցին իր նկատմամբ։ «Մենք բացահայտել ենք նույն Քոչարյանի ժամանակ արդեն Կասկադի հողերի հետ կապված փողերի լվացման սխեմաներ, որում ներգրավված էին դատախազության աշխատողներ, որոնք մտել էին այդ կեղծ առքուվաճառքների մեջ՝ մի քանի միլիոն դոլար՝ ՎՏԲ բանկի միջոցով։

Հսկայական գումարներ էին կանխիկացվել մի քանի օրվա մեջ։ Հենց այս ամենի մասին բարձրաձայնելուց հետո սկսվեց իմ նկատմամբ քրեական հետապնդումը, քանի որ ես ունեի բոլոր փաստաթղթերը, որ եղել է փողերի լվացում։ Կասկադը գերակա շահ էր ճանաչվել միայն նրա համար, որ դրա վրա փողեր լվանային»,- ասաց տիկին Պողոսյանը։

Մեր զրուցակցի խոսքերով՝ Երվանդ Զախարյանի թեթև ձեռքով Կասկադի հողերը ուղիղ վաճառքի միջոցով անցել են նրա մտերիմներին, այդ թվում՝ օտարերկրյա քաղաքացիների, որը հակասում է ՀՀ Սահմանադրությանը և Հողային օրենսգրքին։ Մեր օրենսդրությամբ արգելվում է հող օտարել ՀՀ քաղաքացի չհանդիսացող անձանց։ «Այս բացահայտումներից հետո նախկին դատախազ Օսիպովների ընտանիքի մասին հանցագործության մասին հաղորդում եմ ներկայացրել, քանի որ թե՛ փողերի լվացումը, թե՛ այլ հանցագործություններ եղել են Օսիպովների անմիջական մասնակցությամբ։ Նրա տղան է խոշոր գումար կանխիկացրել, Աղվան Հովսեփյանի օգնականն է 3 միլիո դոլար գումար կանխիկացրել Կասկադի հողերի հետ կապված։ Բնականաբար, այս ամենի պատասխանատվությունը կրում է Ռոբերտ Քոչարյանը և նրա հետ հանցավոր համաձայնության եկած այլ պաշտոնյաներ»,- ընդգծեց իրավապաշտպանը։

Նա այսօր էլ առանձնապես հույս չունի, որ իրենց բացահայտումները կարող են ընթացք ստանալ և իրավական գնահատականի արժանանալ։ Իսկ հակառակում՝ իր նկատմամբ նոր հետապնդումներ սկսելու հարցում, վստահ է։ «Ես որևէ ակնկալիքի մասին չեմ կարող խոսել։ Մենք անցած տարի քննչական կոմիտեի ղեկավարին, ՀՔԾ ղեկավարին ու Վանեցյանին հեռագրեր էինք հղել այս գործի հետ կապված, ներկայացրել էինք ամբողջ սխեման, նշել, որ գործը կուլ են տվել ՀՔԾ նախկին պետ Վահրամ Շահինյանն ու Արթուր Դավթյանը, սակայն մեր բողոքներին այդպես էլ որևէ ընթացք չտվեցին։ Պատկերացնում եք, մենք մի հետաքննությամբ ցույց էինք տվել, որ փողերը լվացվել են ՎՏԲ բանկի միջոցով, այդ փողերը եկել են ռուսական օֆշորներից, դրանք լվացվել են նախկին դատախազի ու այլ պաշտոնյաների կողմից, ու ոչ մի արձագանք։ Փոխարենը՝ իմ դեմ հետապնդում սկսվեց։ Հուսանք՝ այս անգամ ամբողջ ԱԺ-ի դեմ հետապնդում չի սկսվի»,- եզրափակեց Մարինա Պողոսյանը։