Oragir.News-ը շարունակում է ուսումնասիրել ու իր ընթերցողներին ներկայացնել Հայաստանի Հանրապետության Անկախության հռչակագիրը փաստացի չեղարկողների՝ Սահմանադրական դատարանի դատավորների ու նրանց ընտանիքի անդամների ունեցվածքի այն հատվածը, որը տեղ է գտել վերջիններիս գույքի և եկամուտների տարեկան հայտարարագրում։
Այսօր ուսումնասիրել ենք ՍԴ դատավոր Դավիթ Խաչատուրյանի, նրա կնոջ՝ Ալմաստ Խաչատուրյանի, ինչպես նաև նրանց չափահաս զավակների՝ Մանե և Մհեր Խաչատուրյանների հայտարարագրերը։
Հիշեցնենք, որ Խաչատուրյանը 2021-2023 թվականներին եղել է Բարձրագույն դատական խորհրդի անդամ, 2023թ. հոկտեմբերի 30-ին նշանակվել Վճռաբեկ դատարանի քրեական պալատի դատավոր, իսկ այս տարվա մայիսին ընտրվել Սահմանադրական դատարանի դատավոր։ Նա Հակակոռուպցիոն կոմիտեի նախագահ Սասուն Խաչատրյանի հարազատ եղբայրն է։
Որպես անշարժ գույք՝ Դավիթ Խաչատուրյանը հայտարարագրել է միանձնյա սեփականությամբ 1 առանձնատուն՝ Երևանի Արաբկիր վարչական շրջանում՝ գնված 2010 թվականի հուլիսի 19-ին և 1 բնակարան՝ Քանաքեռ-Զեյթուն վարչական շրջանում՝ գնված 2021-ի դեկտեմբերի 1-ին։ Տարեվերջին Խաչատուրյանի անշարժ գույքը նույնությամբ պահպանվել է։
Որպես շարժական գույք՝ ՍԴ դատավորը հայտարարագրել է 2004 թվականի արտադրության LEXUS մակնիշի ավտոմեքենա՝ գնված 2014 թվականի ապրիլի 20-ին։ Այս մեքենան նույնպես տարեվերջին պահպանվել է։
Դավիթ Խաչատուրյանի բանկային հաշիվներին 2023-ի սկզբին եղել է 2.968.440 դրամ և 11.110 եվրո, տարեվերջին՝ 2.649.765 դրամ և 11.104 եվրո։ Կանխիկ միջոցներ նա չի հայտարարագրել։
Դատավորի տարեկան եկամուտները կազմել են 19.079.506 դրամ, որից 18.079.506 Բարձրագույն դատական խորհրդից, 1.000.000 դրամն էլ՝ Բուն գիտամշակութային հիմնադրամից ստացած աշխատավարձն է։
Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ կազմել է 17.352.214 դրամ։
Վերջինս իր եկամուտներից 2.230.000 դրամ հատկացրել է ուսման վարձի համար կատարվող վճարումներին։
Դատավորի կինը՝ Ալմաստ Խաչատուրյանը, աշխատում է ՀՀ Կադաստրի կոմիտեում՝ առաջատար մասնագետ։
Ալմաստ Խաչատուրյանը շարժական և անշարժ գույք չի հայտարարագրել։
Նրա բանկային հաշիվներին տարեսկզբին եղել է 298.000 դրամ, որը տարեվերջին դարձել է 285.620 դրամ։ Դատավորի կինը նույնպես կանխիկ միջոցներ չի հայտարարագրել։
Ալմաստ Խաչատուրյանը տարեկան եկամուտը կազմել է 2.337.228 դրամ, որը ՀՀ Կադաստրի կոմիտեից ստացած աշխատավարձն է։
Դատավորի զավկները՝ Մհեր և Մանե Խաչատուրյանները, ոչինչ չեն հայտարարագրել։ Ողջ տարվա ընթացքում դատարկ են եղել նաև նրանց բանկային հաշիվները, կանխիկ միջոցներ նույնպես նրանք չեն ունեցել։
