Այսօր Ազգային անվտանգության ծառայության տնօրեն Արթուր Վանեցյանը հայտարարել է, որ Երևանի նախկին քաղաքապետ Տարոն Մարգարյանը «Երևան» հիմնադրամի գործով անպայման հարցաքննվելու է։
«Տարոն Մարգարյանը հաստատ հարցաքննվելու է: Օրը կորոշի քննությունը, դրանք քննչական գործողություններ են, քննչական խմբի ղեկավարն ինքն է որոշում կայացնում, թե երբ հրավիրի»,- լրագրողների հետ զրույցում ասել է Վանեցյանը:
«Երևան» հիմնադրամին վերաբերող հանցագործության մասին հաղորդումների հիման վրա Ազգային անվտանգության ծառայությունը հարուցել է քրեական գործ՝ պաշտոնեական լիազորությունները չարաշահման (ՀՀ քրեական օրենսգրքի 308-րդ հոդվածի 2-րդ մաս) և պաշտոնական դիրքն օգտագործելով կատարված խարդախության (178-րդ հոդվածի 2-րդ մասի 1.1 կետ) հատկանիշներով:
Այս տարվա հունիսի 13-ին ՀՀ Ազգային անվտանգության ծառայությունում հաղորդում է ստացվել ՀՀ քաղաքացիներ Վ.Գ.-ից և Ա.Խ.-ից այն մասին, որ Երևանի քաղաքապետարանի պաշտոնատար անձինք, կառուցապատման և գույքի ձևակերպման համապատասխան թույլտվություններ տրամադրելու դիմաց, բացի օրենքով սահմանված վճարումներից, իրենց պարտադրել են «Երևան» հիմնադրամին փոխանցել խոշոր չափերով գումարներ: Նյութերի նախապատրաստման ընթացքում պարզվել է, որ վերոնշյալ պատրվակով առձեռն ստացված գումարների մի մասը հիմնադրամի հաշվեհամար չի մուտքագրվել և հափշտակվել է:
Սույն քրեական գործի շրջանակներում ձերբակալվել են հիմնադրամի տնօրեն Աշոտ Ղազարյանը և Դավիթաշենի թաղապետի տեղակալ Խաչատուր Կարապետյանը:
«Երևան» հիմնադրամի հոգաբարձուների խորհրդի ղեկավարը քաղաքապետ Տարոն Մարգարյանն է, անդամների թվում են փոխքաղաքապետեր, քաղաքապետարանի պաշտոնյաներ, ավագանու անդամներ:
Նշենք, որ ՀՀ քրեական օրենսգրքի 308-րդ հոդվածի 2-րդ մասով նախատեսված է պատիժ՝ 2-6 տարի ազատազրկում, իսկ 178-րդ հոդվածի 2-րդ մասի 1․1 կետով նախատեսված է պատիժ տուգանքով` նվազագույն աշխատավարձի հինգհարյուրապատիկից հազարապատիկի չափով, կամ ազատազրկում` 2-5 տարի ժամկետով:
Գլխավոր
