Վաշխառությունը կամ ինչպես ժողովուրդն է ասում “տոկոսով” փող տալը դարձել է մեծագույն չարիք մեր հասարակության համար: Հիմնական վաշխառուները դրանք նախկին և ներկա պետական պաշտոնյաներ են, որոնք անձամբ կամ միջնորդավորված ստվերային շրջանառության մեջ են դնում կոռուպցիայի արդյունքում իրենց ձեռք բերված միջոցները և տարատեսակ ֆինանսական մեքենայությունների միջոցով օրինականացնում դրանք:
Վաշխառությունը մեր հասարակությունը ստրկացրել է և ծայրահեղ բևեռացրել մի կողմից հարստահարելով և ունեզրկելով քաղաքացիներին, մյուս կողմից դիզելով աստղաբաշխական թվերի հասնող հարստություն: Մեր դիտարկած բոլոր դեպքերում վաշխառուները գործում են կազմակերպված հանցախմբերով և շատ դեպքերում դիմում են նույնիսկ կյանքի սպառնալիքի իրենց տոկոսները կորզելու նպատակով ինչպես վկայակոչելով իրենց կապը իրավապահ համակարգի բարձրաստիճան պաշտոնյաների հետ, այնպես էլ օգտվելով բնակչության ցածր իրավագիտակցությունից: Չնայած որ ըստ ՀՀ քր. օր-ի 213 հ. վաշխառությունը քրեորեն պատժելի է, սակայն վաշխառուները գտնվելով պետական հովանու ներքո խուսափում են պատժից: Վերջիններիս անխափան և անպատիժ գործունեությունը հանդիսանում է ինչպես քաղաքացիների ծանր սոցիալական վիճակի, բարոյալքման և արտագաղթի հիմնական պատճառներից մեկը, այնպես էլ տնտեսական ճգնաժամի հիմնախնդիրը:
Կոչ ենք անում վաշխառուներից տուժած անձանց չտրվել վերջիններիս հորդորներին, տեր կանգնել իրենց իրավունքներին և չվախենալ նրանց սպառնալիքներից, ինչպես նաև վերջիններիս ՛՛կապերից իրավապահ համակարգում՛՛:
