Սիրուշոյի կնքամոր գործով վճիռը կայացնելու է Քոչարյանին կալանավորած դատավորը (Տեսանյութ)

Ըստ նախորդ ռեժիմի ժամանակ գործող հատուկ քննչական ծառայության՝ այս երկու ստորագրությունները նույն մարդու կողմից են դրվել։ ՀՀ Ոստիկանությունը 2015-ին ընդունել է Կանադայի քաղաքացի Արփի Մերասի՝ Սիրուշոյի կնքամոր կողմից հանցագործության մասին հաղորդում՝ «Վելես» իրավապաշտպան ՀԿ-ի նախագահ Մարինա Պողոսյանի դեմ։ Նույն թվականին հաղորդման հիման վրա Պողոսյանի դեմ քրեական գործ է հարուցվել։

Հաղորդումն ընդունելով ու քրեական գործ հարուցելով՝ ՀՀ ոստիկանությունը խախտել է ՀՀ քրեական դատավարության օրենսգրքի 177 հոդվածի 2-րդ և 7-րդ մասերը, քանի որ հաղորդումը չի եղել բնօրինակ փաստաթուղթ, այլ եղել է պատճեն, նշված անձի ստորագրությունը չի համապատասխանել նրա անձնագրային ստորագրությանը, նշված հասցեն էլ՝ իրական հասցեին։ Ստացվում է՝ ՀՀ ոստիկանությունում չեն իդենտիֆիկացրել հաղորդում տվողին, ասել է թե՝ ցանկացած մարդ ուրիշի անվան տակ, ինչ-որ ստորագրություն և հասցե հորինելով կարող է հանցագործության մասին հաղորդում գրել։

Այս դեպքում Արփի Մերասի փոխարեն հավանաբար ստորագրել է փաստաբան Հրանտ Անանյանը։ Լիազոր անձը՝ փաստաբանն իրավունք ունի իր պաշտպանյալին վերաբերող փասթաղթերում ստորագրելու, սակայն իր սեփական անվան տակ, ոչ թե պաշտպանյալի։

ՀՔԾ-ի անգործության վերաբերյալ դատական գործը Շենգավիթի ընդհանուր իրավասության դատարանում քննում է դատավոր Վաչե Մարգարյանը՝ հենց այն դատավորը, որն այս տարվա հուլիսի 27-ին կայացրել էր Ռոբերտ Քոչարյանի կալանքի որոշումը։ Հոկտեմբերի 2-ին կկայացվի այս գործով որոշումը, ակնկալվում է բավարարում։

Եթե ՀՔԾ նախկին ներկայացուցիչների, այդ թվում նախկին պետի տեղակալ Մուշեղ Բաբայանի դեմ քրեական գործ չհարուցվի, նշանակում է ստեղծվում է նախադեպ անհասցե, կեղծ ստորագրությամբ, ոչ բնօրինակ հանցագործության հաղորդումներ ներկայացնելու համար։

Հիշեցնենք, որ խնդրահարույց հաղորդման հիման վրա 2015-ին Մարինա Պողոսյանին մեղադրանք էր առաջադրվել Արփի Մերասին պատկանող տունը վաճառելու և վաճառքից գոյացած գումարը հափշտակելու համար։ Ամիսներ առաջ Պողոսյանն անմեղ է ճանաչվել Երևան քաղաքի ընդհանուր իրավասության դատարանի կողմից։ Գործի քննության ընթացքում Արփի Մերասը մահացել է, սակայն նրա փաստաբանը, որն այժմ ներկայացնում է Մերասի որդու շահերը, բողոք է ներկայացրել Ընդհանուր իրավասության դատարանի կայացրած վճռի դեմ։

Մանրամասները՝ տեսանյութում