«Վելես» իրավապաշտպան հասարակական կազմակերպությունը դիմումներ է ստացել Երևանի մի քանի բնակիչներից, որոնք պատմում են, որ «Էլիտ Գրուպ» ՓԲԸ-ն ստվերային քաղաքականություն է որդեգրել՝ բնակարաններիվաճառքի իրական գումարների մեծ մասը պայմանագրերում չնշելով, կանխամտածված փոփոխելով մուտքագրված գումարը, յուրացրել է դրանք, ինչպես նաև՝ խուսափել հարկային պարտավորություններց:
Politik.am-ի հետ զրույցում «Վելես» հկ-ի նախագահ Մարինա Պողոսյանը ասում է.
«Բնակչից գումարը վերցրել են, ու գրանցումներ չեն արել: Ամբողջ ընթացքում խուսափել են հարկերից: Խոսքը միլիոնավոր դրամների մասին է: Այդ ամենի հետ մեկտեղ՝ կառուցապատման աշխատանքներն են վատ արվել: Դեպքեր ունենք, որ 8-10-րդ հարկերից քարեր են թափվել»:
Փաստաբան Արթուր Սուքիասյանը, ով ուսումնասիրում է բնակիչների դիմումները, ասում է.«Խոսքը 17 տարբեր շենքերի մասին է: Մի ընտանիքի դեպքում, օրինակ, առքուվաճառքի գումարը կազմել է 100 մլն դրամից ավելի, որից փասաթղթերում ներկայացվել է մոտ 50 մլն դրամը, մյուս (մոտ) 50 մլն-ն չի ցուցադրվել: Այսինքն՝ դրան համապատասխան հարկերը պետությանը չեն վճարվել: Մի ուրիշ դեպքում էլ՝ 20 մլն-ից ավել չի ցուցադրվել փաստաթղթերում»:
Փաստաբանի խոսքով՝ բնակիչների մոտ որոշ փաստաթղթեր բացակայում են՝ մեկի մոտ մի բան կա, մյուսի մոտ մեկ այլ բան: Ուսումնասիրություններն էլ կատարվել են այդ փաստաթղթերի հիման վրա:
Մարինա Պողոսյանն ասում է, որ իրենք մոտակա օրերի ընթացքում պատրաստվում են հանցագործության մասին հաղորդում տալ Ոստիկանությանը:
«Հաղորդումը կտանք «Վելես» հկ-ի, թե բնակիչների կողմից, դեռ որոշված չէ, բայց որ հաղորդում ենք տալու, հստակ է»,-ավելացնում է փաստաբան Արթուր Սուքիասյանը:
Politik.am-ը կապ հաստատեց նաև «Էլիտ Գրուպ»-ի լրատվական բաժնի հետ: Աշխատակիցը, ով չցանկացավ ներկայանալ, խոստացավ ուսումնասիրել «Վելես» հկ-ի հայտարարությունն ու պատասխանել մեզ, բայց արձագանք, այդպես էլ, չստացանք:
«Վելես» հկ-ի՝ օրեր առաջ տարածած հայատարարությանը՝ «Էլիտ Գրուպ»-ի կատարած ապօրինությունների մասին կարող եք ծանոթանալ հետևյալ հղումով:
© Politik.am