Հայաստանում պայմանագրային ծառայության գրավչության բարձրացման նպատակով նախատեսվում է ներդնել ժամկետային ծառայությունից պայմանագրայինին անցնելու նոր համակարգ։
Նոյեմբերի 14-ին Ազգային ժողովում՝ Պաշտպանության եւ անվտանգության մշտական խորհրդարանական հանձնաժողովի նիստում, «Զինվորական ծառայության եւ զինծառայողի կարգավիճակի մասին» օրենքում փոփոխություններ եւ լրացումներ կատարելու մասին օրինագծի քննարկման ժամանակ այս մասին ասաց պաշտպանության նախարար Սուրեն Պապիկյանը։
Ծրագրի համաձայն՝ շարքային զինծառայողներն ու սպաները 6 ամիս ժամկետային զինվորական ծառայությունից հետո կկարողանան անցնել 5 տարվա պայմանագրային ծառայության։ Բացի այդ, նրանք կկարողանան օգտվել բոլոր այն արտոնություններից, որոնք նախկինում ընդունվել էին պայմանագրային ծառայության խրախուսման համար։
«Պայմանագրային ծառայության անցնելու որոշումը կարող է ընդունվել ժամկետային ծառայության ցանկացած փուլում, սակայն այն սկսելուց 6 ամսից ոչ շուտ։
Պայմանագրային ծառայության ժամկետի ավարտից հետո կամ առողջական վիճակի պատճառով նախատեսված ժամկետից շուտ պայմանագրային ծառայությունը դադարեցնելու դեպքում պայմանագրային զինծառայողներին կտրվի 5 մլն դրամի պատվովճար, որը նրանք կարող են ծախսել իրենց հայեցողությամբ։ Միաժամանակ, նշված գումարի տրամադրումից հետո պայմանագրային ծառայությունը կարելի է շարունակել»,- պարզաբանեց նախարարը։
Պայմանագրային ծառայության անցնողները կստանան աշխատավարձ եւ առաջխաղացման որոշակի հեռանկարներ կունենան։ Օրինակ՝ մարտական հերթապահության դեպքում պայմանագրային զինծառայողի աշխատավարձը կարող է կազմել մինչեւ 380 հազար դրամ (առանց հարկերի)։
«Բացի այդ, պայմանագրային ծառայողները ատեստավորման ենթակա կլինեն: Այն բարեհաջող անցնելու դեպքում պայմանագրային ծառայողներին հավելավճար կտրվի՝ ծառայության այս կամ այն կատեգորիայի համար սահմանված չափին համապատասխան»,- ասաց նախարարը։
Պապիկյանը հայտնեց նաեւ, որ նոր ծրագրի մեկնարկի կապակցությամբ նախատեսվում է «Սա ես եմ» ծրագրի դադարեցում։ Այս ծրագրի շրջանակում ներկայումս ծառայում է ընդամենը երկու զինծառայող։ Նրանց ծառայության ժամկետը կավարտվի 2023 թվականի հունվարին։
Համեմատաբար կարճ քննարկումներից հետո օրենսդրական նախաձեռնությունը ստացավ մշտական խորհրդարանական հանձնաժողովի դրական եզրակացությունը։
Գլխավոր
