ՍԴ նախագահ Հրայր Թովմասյանը Բարձրաստիճան պաշտոնատար անձանց էթիկայի հանձնաժողովին բավականին աղքատիկ է ներկայացրել իր ունեցվածքը։ Մեր ձեռքի տակ են հայտնվել ՍԴ նախագահի անշարժ գույքերի և դրանք թաքցնելու մասին բավականին ուշագրավ տեղեկություններ։
Մասնավորապես մեր տեղեկություններով ՍԴ նախագահ Հրայր Թովմասյանը բնակվում է Երևանի փոքր կենտրոնում՝ Բուզանդի փողոցում գտնվող բավականին մեծ և ընդարձակ բնակարանում, որի 213.5 քմ մակերեսը ձևակերպված է իր անունով և այն գնել է 2013 թ-ին 83 մլն դրամով, իսկ մյուս՝ 65.8 քմ մակերեսը, որը գնել է 27 մլն դրամով ձևակերպել է կնոջ քրոջ անունով։ Հետաքրքիրն այն է, որ այս բնակարանի 1 քմ-ի արժեքը, ըստ պայմանագրի ստացվում է 830 ԱՄՆ դոլարին համարժեք դրամ, բայց մեզ հայտնի է դարձել, որ Բուզանդի փողոցում գտնվող բնակարանների 1քմ-ի շուկայական արժեքը 2013թ․ եղել է 1500 ԱՄՆ դոլարին համարժեք դրամ։ Բացի այդ, Թովմասյանն իր այս ընդարձակ բնակարանը շքեղ վերանորոգել է և կահավորել։
Սա Թովմասյանի միակ անշարժ գույքը չէ։ Հավատարիմ մնալով իր նախկին աշխատելաոճին, նախկին նախարարը կրկին կնոջ քրոջ և վերջինիս ամուսնու անունով է գրանցել հերթական անշարժ գույքը, Ալեք Մանուկյան փողոցի թիվ 8/1 շենքի 1-ին հարկի տարածքը(շուրջ 131 քմ), որը գնել է «ֆանտաստիկ գնով»՝ ընդամենը 3 մլն դրամով։ Այստեղ զավեշտալին այն է, որ առուվաճառքի գործարքի ժամանակ, գույքը վաճառողի անունից որպես լիազորված անձ հանդես է եկել նույն ինքը՝ Հրայր Թովմասյանը։ Բայց այս գործարքում կա մի հետաքրքիր փաստ, որ վաճառողը տվյալ տարածքը 2006 թ․ գնել է 52 մլն դրամով, իսկ 2009թ-ին, չգիտես ինչու վաճառել է 17 անգամ ավելի պակաս գնով՝ 3 մլն դրամով։ Հետագայում այս նույն տարածքը Հրայր Թովմասյանը ՀՀ արդարադատության նախարարի պաշտոն զբաղեցնելու տարիներին, շուրջ 2 տարի ամսական բավականին խոշոր գումարով հանձնել է վարձակալության «Նոտարական պալատ» ՊՈԱԿ-ին, որը գործում է արդարադատության նախարարության ենթակայության ներքո։
ՍԴ նախագահի անշարժ գույքերը սրանով չեն սահմանափակվում։ Պարզվում է Բուզանդի շենքում, որտեղ բնակվում է Հրայր Թովմասյանը, կա շուրջ 22 քմ մակերեսով ավտոկայանատեղի, որը Թովմասյանի դուստրը, որպես նվեր ստացել է մորաքրոջ աղջկանից, ով 2014թ․ օգոստոսի 1-ին գնել է 12 մլն դրամով և 4 օր անց՝ օգոստոսի 5-ին նվիրել է Թովմասյանի դստերը։
Բայց սա մորաքրոջ աղջկա կողմից Թովմասյանի դուստրերին արված միակ նվերը չէ։ Նույն մորաքրոջ աղջիկը 2014 թ․ ավտոսրահից շուրջ 9 մլն դրամով գնել է «Nissan Sentra» մակնիշի ավտոմեքենա և նվիրել Թովմասյանի մյուս դստերը։
Փաստորեն ստացվում է, որ նախկին ՀՀԿ-ականն ու ներկայիս ՍԴ նախագահն այս ամբողջ ունեցվածքը հասցրել է ձեռք բերել, ամենայն հավանականությամբ արդարադատության նախարար աշխատելու տարիներին կուտակած գումարներով։ Հատկանշական է նաև այն, որ իր բարեկամների անուններով, մասնավորապես՝ կնոջ քրոջ, նրա ամուսնու և նրանց աղջկա անուններով ձևակերպված տարածքները մինչ օրս փաստացի պատկանում են Հրայր Թովմասյանին, իսկ տնօրինումը որպես լիազորված անձ իրականացնում է իր մտերիմներից մեկի միջոցով։
Հետաքրքիր է, թե որտեղից է նախկին ՀՀԿ-ականն այսքան գումարներ կուտակել, որ կարողացել է իրեն թույլ տալ քաղաքի կենտրոնում ունենալ նման անշարժ գույքեր, աստղաբաշխական թվերի հասնող շքեղ վերանորոգում կատարել և որ ամենակարևորն է՝ թաքցնել գումարների ծագման աղբյուրն ու ներկայանալ շարքային պաշտոնյային հասու հայտարարագրով։
© 1in.am
