Ավելի վաղ հայտնել էինք, որ Աննա Վարդապետյանի՝ Գլխավոր դատախազի պաշտոնը ստանձնելուց հետո կադրային մեծ փոփոխություններ են սպասվում։
Փոփոխությունները, իհարկե, իրենց սպասեցնել չտվեցին։
Արդեն իսկ պաշտոններից ազատվել են դատախազի երեք տեղակալները՝ Հայկ Ասլանյանը, Վահե Հարությունյանն ու Արմեն Աֆանդյանը։ Վարդապետյանը ազատվեց նաեւ Երեւան քաղաքի դատախազից՝ Սեւակ Հովհաննիսյանից, նրան տեղափոխեց զինդատախազի տեղակալի պաշտոնին, որտեղից արդեն ազատվելու դիմում ներկայացրել Հովհաննիսյանը։ Ինչեւէ, կադրային փոփոխությունները լայն թափով շարունակվում են։ Հայեցողական պաշտոններ զբաղեցողները եւս ազատվում են պաշտոնից, ինչը պետական համակարգում ընդունված պրակտիկա է, խորհրդական Գոռ Աբրահամյանը հեռացավ Արթուր Դավթյանի հետ, նրան փոխարինեց փոխվարչապետի խոսնակ Լուսինե Մարտիրոսյանը, ում հետ Վարդապետյանը աշխատել է Արդարադատության նախարարությունում։
Մեզ հայտնի դարձավ, որ առաջիկայում նոր փոփոխություններ են լինելու, հերթը հասել է վարչության պետերին, տարածքային բաժիններին։ Նախ նորանշանակ դատախազը մի շարք վարչություններ միացնում է, քանի որ համարում է՝ դրանք նախորդի օրոք ուռճացվել են մի քանի ընկեր-բարեկամ-սանիկի պաշտոնով ապահովելու համար։ Օրինակ՝ Վարդապետյանը մտադիր է կրճատել բնակչության առողջության դեմ ուղղված հանցագործությունների գործերով վարչությունը, հասարակական անվտանգության դեմ ուղղված հանցագործությունների գործերով վարչությունը՝ ըստ այդմ ազատվելով վարչության պետերից՝ Արմեն Փանոսյանից եւ Վահագն Մուրադյանից, պաշտոնից կազատվի նաեւ ԱԱԾ մինչդատական վարույթի օրինականության նկատմամբ հսկողության վարչության պետ Արթուր Չախոյանը։
Կադրային փոփոխությունների այսքանով չեն ավարտվելու, շարքը շարունակական է լինելու։
© ORAGIR.NEWS https://oragir.news/hy/material/2022/09/28/57451
