Բարձրագույն դատական խորհուրդը Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղում ընտրելու համար առաջադրել է Սերգեյ Մարաբյանի, Ռուբիկ Մխիթարյանի և Մանվել Շահվերդյանի թեկնածությունները: Այսօր՝ դեկտեմբերի 5-ին, հարցը քննարկվում է Ազգային ժողովում։
Թեկնածուներին խորհրդարանում ներկայացրեց ԲԴԽ նախագահ Կարեն Անդրեասյանը։ Պատգամավոր Սարգիս Խանդանյանը հետաքրքրվեց՝ Սերգեյ Մարաբյանից բացի, մյուս 2 թեկնածուներն ինչո՞ւ չեն եկել ԱԺ․ «Որերորդ անգամ է՝ դատավորների ընտրությունների ժամանակ թեկնածուներից մեկը, այս դեպքում արդեն 2-ը չեն ներկայանում ԱԺ։ Սա հարգալից վերաբերմունք չէ ինստիտուտի նկատմամբ։ Այսօր պիտի ընտրություն անենք, բայց ընտրություն չունենք։ ԲԴԽ-ն պետք է հետևություն անի սրանից»։
Կարեն Անդրեասյանը նշեց, որ իրենք էլ իրենց «անհարմար» զգում նման իրավիճակներում։ Նա հայցեց ԱԺ-ի ներողամտությունը։
«Որպես արդարացում կարող եմ ասել, որ ԲԴԽ-ն շատ փոքր մրցակցություն է ունենում Վճռաբեկ դատարանի պաշտոնների համար։ Որերորդ անգամ է՝ մենք ընտրում ենք 3 հավակնորդից 3-ին։ Նույնիսկ չեն ունենում 4-րդ դիմումը, որպեսզի ինքներս կարողանանք ընտրություն կատարել»,-նշեց խորհրդի նախագահը՝ հավելելով, որ դատավորներից մեկը առողջական լուրջ խնդիր ունի, վիրահատվել է բոլորովին վերջերս։ Մյուսը նամակ է ուղղել ԱԺ նախագահին՝ հայտնելով իր ծրագրերի փոփոխության մասին։
