24-ամյա Արայիկ Բաղդասարյանը սեպտեմբերի 28-ին կամավորագրվել էր Արցախ մեկնելու համար, զինկոմիսարիատում ասել էին՝ սպասիր, երբ անհրաժեշտություն լինի, կկանչենք։
Արայիկը, սակայն, չէր համբերել։ «Նույն օրը բշիշկների խումբ է գտել, որոնք Արցախ էին գնում, իրենց հետ գնացել է, մեզ էլ չի ասել, թե որտեղ է»,- «Հակակոռուպցիոն բլոգ»-ի հետ զրույցում պատմում է Արայիկի մայրը՝ Գոհար Դավթյանը։
«Որտե՞ղ ես»,- հարցրել է մայրը․ «քո տղան որտե՞ղ պիտի լիներ»՝ պատասխանել է որդին։ Պատերազմի օրերին ընտանիքը աշխատել է չզանգահարել Արայիկին։ Հոկտեմբերի 1-ին տղան sms հաղորդագրություն է ուղարկել մորը՝ «Սաղ լավ ա», հոկտեմբերի 2-ին քրոջը՝ «Ամեն ինչ լավ ա»։ Դա եղել է Արայիկից ստացված վերջին տեղեկությունը։ Մեկ շաբաթ անց ընտանիքը պատերազմին մասնակցած ծանոթից լսել է, որ Արայիկին վերջին անգամ տեսել են հոկտեմբերի 4-5-ին Հողաթաղ գյուղում։
Գոհար Դավթյանը տղային գտնելու համար բախել է բոլոր պետական և վերպետական դռները, գնացել է նաև Պաշտպանության նախարարություն, որտեղ բողոքի ակցիա իրականացնողների մեջ նաև սադրիչների է նկատել։ Մայրը ապշած է պետության անտարբերությունից․ «Գնում ենք «Թեժ գիծ», ասում են՝ գնացեք նախարարություն, նախարարությունից էլ ասում են՝ գնացեք «Թեժ գիծ»»,- պատմում է տիկին Գոհարը։
Արայիկ Բաղդասարյանի մայրը կոչ է անում որդեկորույս մայրերին համախմբվել և պայքարել, հավաքվել Կառավարության շենքի դիմաց և իրենց բողոքի ձայնը հասցնել ոչ միայն ՀՀ իշխանություններին, այլև ամբողջ աշխարհին։
Մանրամասները՝ տեսանյութում։
