Ազգային ժողովը նախօրեին ամբողջությամբ ընդունել է նաև կառավարության կողմից ներկայացված «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասին» օրենքի նախագիծը։
Օրենքի համաձայն՝ «որպես առանձնակի ռիսկայնություն ունեցող աշխատանք՝ Հակակոռուպցիոն կոմիտեի քննիչների համար սահմանվել է հավելում՝ պաշտոնային դրույքաչափի 92 տոկոսի չափով (նախկինում այն եղել է 100 տոկոս)»,- նշված է նախագծում:
Իրավապաշտպան Մարինա Պողոսյանն Oragir.News-ի հետ զրույցում, անդրադառնալով Հակակոռուպցիոն կոմիտեի քննիչների աշխատավարձի գրեթե 100 տոկոս բարձրացմանը, ասաց, որ բնական է, որ այս իշխանությունը, օրինակ, ուսուցչի աշխատավարձը չէր բարձրացնի այդքան, որովհետև ուսուցիչն իշխանության պատվերը չի կատարում։
«Հակակոռուպցիոն կոմիտեն, Կոռուպցիայի կանխարգելման հանձնաժողովը, Քննչական կոմիտեն պետք փակել, իրենք կան-չկան, մեկ է։ Ի դեպ, ես առաջիկայում շատ մեծ բացահայտում եմ անելու, թե ինչպես է աշխատում «կաշառք-զանգ» շղթան։ Ես ուզում եմ իմանալ՝ քննիչների աշխատավարձը, որ 100 տոկոս բարձրացնում են՝ կարո՞ղ են ասել, թե որն է իրենց 2 տարվա մեջ տված պրոդուկտը, ինչքա՞ն գումար են նրանք պետությանը հետ բերել, իրենց ստացած աշխատավարձը այդ գումարը փակո՞ւմ է։ Եթե ես աշխատող եմ ընդունում ու աշխատավարձ եմ տալիս, ես պիտի իմանամ, որ այդ աշխատողը այնքան պրոդուկտիվ է, որ իր ստացած 90 հազար կամ 9 մլն դրամը նա կարողանում է հետ բերել։ Հիմա թող Հակակոռուպցիոնի Սասունը հրապարակի, թե որքան գուրմար են հետ բերել։ Ինն ամիս գործ են քննում, որ ոստիկանները ինձ բռնության են ենթարկել, եթե ամեն ամիս 1 մլն աշխատավարձ են ստանալու, ապա թող ինձ միանգամից 9 մլն տան, գործն էլ չքննեն»։
Նա ընդգծեց, որ քննիչների վրա գործեր կան հարուցված, որոնք տարիներով քննում են, 2 տարի եթե պետք է քննիչն աշխատավարձ ստանա, դա բացարձակ արդյունավետ չէ։
«Այս աղքատ երկրում, երբ զինվորը գետնին է քննում, Հակակոռուպցիոն կոմիտեի քննիչն ինչո՞ւ պետք է նման բարձր աշխատավարձ ստանա։ Ընդհանրապես, քննչական մարմինների մասին խոսելը մեր երկրում լրիվ անիմաստ է, իրենք ընդամենը կամակատարներ են, պատվեր կատարողներ, ոչ թե հանցագործություններ բացահայտողներ, քանի՞ բարձրաստիճան պաշտոնյա ունենք դատված։ Նրանց արդյունավետությունը, հասկանալու համար թող հրապարակեն Հակակոռուպցիոնի աշխատավարձերի ֆոնդն ու ասեն, թե որքան գումար են հետ բերել, քանի քննիչ է դատվել, անցած տարի քանի քննիչով ունեինք հաղորդում ներկայացրած, վերջում գործը կարճում են։ Այսինքն, մենք իրենց փող ենք տալիս, որ նստեն մեր գործերը կարճեն ու մենակ Նիկոլի պատվերը կատարե՞ն։ Դե թող լինի Նիկոլի շտաբ, որի մեջ կարող է մտնել Քննչական կոմիտեն, Հակակոռուպցիոն կոմիտեն, Կոռուպցիայի կանխարգելման հանձնաժողովը, Հակակոռուպցիոն դատարանը, Դատախազությունը, ինչքան փող ուզում են թող տան նրանց։ Հակակոռուպցիոնը հանգիստ կարող են փակել, ինչ տարբերություն, որ չկար էլ՝ ոչ մի խնդիր չկար։ Մեր գրասենյակը 4 հոգով ավելի շատ գործ է անում, քան Հակակոռուպցիոնը, կարող են «Վելեսի» ածանցյալը դառնալ։ Նրանց փողը բարձրացնում են, որ իրենց ծառայեն, սրանք Նիկոլի անհատական անձնակազմն ու իր նազիրվեզիրներն են»։
© ORAGIR.NEWS https://oragir.news/hy/material/2023/05/27/80777
